Dýfingar

Ítölks knattspyrna og ítalskir knattspyrnumenn eru ekki í miklum metum hjá mér og hafa ekki verið síðan menn á borð við Maradona, Van Basten og Gullit léku listir sínar þar í landi.

Í fyrra voru nokkur af stórliðum landsins uppvís að svindli og Juventus m.a. dæmt niður í Seria B. Fyrir nokkrum vikum urðu áhorfendur ofl. sér til skammar og endaði það mál með því að keppni í ítalskri knattspyrnu var bönnuð, tímabundið,  af stjórnvöldum þar í landi.

Í vikunni var leikið  í Meistaradeild Evrópu, 16 liða úrslitum. Þar léku ítölsku liðin Roma og AC Milan ásamt fleiri liðum. Leikmenn Roma fengu hvert gula spjaldið á fætur öðru fyrir ótrúleg tilþrif í dýfingum. Svo mikilfengleg voru tilþrifin að leikurinn hefði betur farið fram í Ólympíu-sundlauginni, af hæsta palli.

Einn af leikmönnum AC Milan átti þó tilþrif kvöldsins, eftir að hafa komist inn í vítateig, fram hjá varnarmanni og markmanni varð leikmanninum ljóst að hann myndi ekki ná knettinum. Lætur hann sig ekki falla með þessum líka ótrúlegu tilþrifum að annað eins hefur ekki sést á byggðu bóli,  ein frægasta dýfa sögunnar, þegar  Greg Louganis  rak hausinn í brettið og rotaðist á Ólympíuleikunum 1988 í Seoul, bliknar miðað við tilþrif Ítalans.

Ég verð að lýsa yfir óánægju minni með ítalska knattspyrnu, svona framkoma á ekkert skilt við annars frábæra íþrótt.

Athugasemdir

[Lúlli (IP-tala skráð) 23.2.2007 kl. 23:28]

Gæti ég ekki verið meira sammála þér bróðir sæll. Þeir eru muggóttir þessir spagettigreifar.

En þar sem þú hefur nú gaman af skagaknattspyrnunni þá hvet ég þig eindregið til að kíkja á blogg matarklúbbins Ingjalds. Þar er farið vel og vandlega yfir leiki Skagamanna þessa daganna. Pistlahöfundar eru hvort tveggja með upphitun og niðurlag á hverjum leik. Kíktu og njóttu.

http://ingjaldur.bloggar.is/

Annars máttu skila því til Krissýjar að vinkona hennar, hún Britney litla, er aldeilis að standa sig þessa daganna...EKKI SATT KRISSÝ mín? 

[Maren (IP-tala skráð) 25.2.2007 kl. 10:27]

  Ég verð aðeins að fá að verja okkar menn, þar sem ykkur bræðrunum virðist vera í nöp við þá.   Ég get alveg verið sammála um að spilling og leikaraskapur í efstu og frægustu deildum ítalskrar knattspyrnu er stundaður af miklu kappi, og er til staðar á öllum sviðum þar sem miklir peningar og viðskiptahagsmunir eru.  Sjálf hætti ég að fylgjast með efstu deildunum í ítalskri knattspyrnu árið 2004 eftir Evrópukeppnina þar sem mér fannst hroki og hégómaháttur leikmannana,  keyra um þverbak.   Einu afskipti mín af þessari íþrótt síðan þá í landi "spagettigreifanna"  er að ég fylgist með ég syni mínum sem æfir knattspyrnu með US. Gragnano, og verð ég að segja þeim til hróss að allur aðbúnaður og undirbúningur hinna ungu leikmanna er til mikillar fyrirmyndar, æfingar 3 svar í viku 2 og hálfur tími í senn.  Þjálfarar frábærir fagmenn og mér til mikillar ánægju hefur syni mínum fleygt fram og farin að spila nokkuð vel og farinn að hafa ótrúlega gaman af leiknum.   Ég mæti reglulega á leiki og við foreldrar skemmtum okkur konunglega að sjá þessa litlu fótboltamenn framtíðarinnar leika listir sínar.    Þannig ekki drulla yfir ítali takk fyrir, heldur eitthvað annað eins og OF mikla frægð og OF mikla peninga!   Svo verður gaman að sjá hvort hvort Finnur og Albert eigi kannski eftir að takast á í framtíðinni....hvað eigum við að segja ÍA versus KR?????     

[Hafsteinn Gunnarsson, 26.2.2007 kl. 10:35]

Alls ekki í nöp við ykkar menn, eingöngu verið að gagnrýna knattspyrnumenn í efstu deild og sýnist mér við vera sammála þar.

Vonandi spila strákarnir okkar saman í framtíðinni, það væri nú gaman.